罷工，唔應該係「為咗年青人」
唔好忘記呢個香港你都有份
為咗你自己嘅自由
為咗你身處嘅家
8月5日，做你認為正確嘅事
罷工係為自己，唔係為人地
目前好多文宣勸人罷工，遊說技巧上都運用咗情緒勒索，呢樣係我從來都唔主張嘅遊說方式。「有人為你而坐監，你都唔願意為佢罷一次工？」呢個講法，立場相近嘅人，已經加入抗爭嘅人會覺得好合理，但其實會極之容易引發一種令抗爭者都啞口無言嘅回應：「我都冇叫佢地代我去抗爭，關我咩事啫？」而要避免運動走向呢種互相指摘嘅局面，我地必須思考清楚嘅問題係：到底我地抗爭所為何事。
好多人都以為，抗爭就係為香港，但我可以好肯定咁答，至少我自己，係真係只為自己。我絕對理解遊說他人加入係好重要，但非自發嘅行為，從來都唔會持久，呢點大家必須記得。支持抗爭嘅一方，因為自己付出好多，而用自己嘅付出去強迫另一方接受自己嘅理念，呢種係赤裸裸嘅要脅，完全背離咗爭取自由嘅本意。有人到而家都唔企出黎，到而家都仍然選擇返工，有人到而家都唔覺得香港要獨立，呢啲都係佢地嘅選擇黎，以死相迫嘅群體，只會走向內鬥，然後任得中共坐享漁人之利，咁樣嘅群體，係絕對唔會行得遠。
批評人地做得唔夠多之前，請大家反省自己，係咪真係有同全香港人共同進退嘅覺悟，就算同路人行得好慢我都一定會繼續等嘅覺悟。如果大家都係香港人，咁就請控制自己嘅憤怒無助，用理性去接受同路人真係需要時間去跟上大家步伐呢個事實。個體攬埋其他人嘅責任上身，以為自己為香港奉獻咗好多，呢個係個體嘅active choice，係個體甘心為自由而受嘅代價，其他人係毋須為個體嘅付出而放棄佢地原有嘅生活。要求其他人為自己嘅active choice負責，只會演變成道德迫害，而唔會凝聚到個體之間嘅情感。
相信自己嗰套，就身體力行去做自己嗰套，人地尚未相信，照計係唔應該影響到你嘅選擇。梁天琦去咗坐監，只係負返自己嘅責任，如果佢埋怨香港害佢坐監，咁就等同將個體無法承受嘅風險轉嫁至他人，最後群體理念就會因為個體嘅自身難保而變得脆弱易碎，隨時破裂。如果而家罷工真係未係時候，得幾十萬人嚮應，我地係咪就要灰心喪志？我地要從中學習嘅係，香港大多數人嘅政治覺醒都未到，咁我地下一步可以點做？就係做好自己，直到佢地都肯轉變為止。而要令佢地轉變，首先就係要畀佢地感受到，我地係真係知道何謂自由，亦真係可以付諸實踐，知行合一。
只有每個個體都明白乜叫自由，咁自由至有可能成為群體嘅理念，而且無堅不摧。因此，只有每人都根據自身能力去做好自己份內事，同時估量自身可以承受嘅風險，民意先有可能更進一步，而非反彈倒退。不負責任嘅個體，自以為幫緊成個社會嘅個體，其實都只係未夠自覺嘅個體，冒進而累事。而一堆未夠自覺嘅個體所建立嘅，到最後都必然係一個不負責任嘅群體，群體嘅結局，亦必然係因為個體嘅互相攻擊而逐漸解離。
大方向統一嘅話，每個個體都應該有自己為大方向貢獻嘅空間，而大方向既然未定，過程中嘅混亂係無可避免，大家心急都急唔黎。我地永遠要做嘅，係促進大方向統一，令大家明白中國自始至終反對自由，而唔係喺大方向都未整合好之前，就強迫其他香港人投誠，否則就唔當佢地係香港人。對內行刑好容易，杯葛佢，刺激佢，但行刑過後，清算過後，我地只會距離真正大團結更加遙遠。
文宣所反映嘅心態，好唔健康，而比較自己同他人付出嘅言論，呢兩個月以黎，確實亦唔算罕見。我從來唔會話我城乜乜乜，因為我只代表我自己，只會諗我身為個體，點樣唔好拖累群體，而我知道精進自身，分工合作，至係最幫到成件事嘅方法。希望大家都可以諗清楚自己作為個體，要具有點樣嘅心態，至會對群體未來成長最為有利。
我知今次抗爭失敗，香港人下場會好淒慘，但請大家記住，戰爭嘅成敗，從來唔係睇一次半次，一時失利，可能更加係我地整頓自己嘅最佳時機。
Search